Virtrag Gerd Klestadt

De 7. Mee huet d’Gemeng Suessem am Kultur- a Geschichtshaus „A Gadder“ eng Konferenz mat der Dr. Kathrin Mess organiséiert, déi dem Liewen an dem aussergewéinleche Parcours vum Gerd Klestadt gewidmet war – engem Iwwerliewende vun der Shoah, dee vill Jore laang enk mat der Gemeng Suessem verbonne war an deen Ufank 2025 verstuerwen ass.

Am Kader vun hirer ronn annerhallwer Stonn laanger Presentatioun, huet d’Dr. Mess d’Liewensgeschicht vum Gerd Klestadt nogezeechent. Hien ass 1932 zu Düsseldorf op d’Welt komm an ass schonn am Alter vu véier Joer mat senger Famill an Holland geflücht, fir dem nationalsozialistesche Regimm ze entkommen. Am Joer 1943 gouf d’Famill verhaft an deportéiert.

De Gerd Klestadt gouf fir d’éischt am Konzentratiounslager Westerbork bei Groningen festgehalen, ier hien op Bergen-Belsen iwwerfouert gouf, wou hien am Abrëll 1945 vun den alliéierten Truppe befreit gouf. An den 1970er Joren hunn de Gerd Klestadt a seng Fra Charlène sech zu Lëtzebuerg niddergelooss.

Besonnesch ervirgehuewe gouf och d’Buch Noch heute quält mich die Erinnerung, dat d’Dr. Kathrin Mess zesumme mam Gerd Klestadt verfaasst huet. An dësem Wierk gëtt seng perséinlech Zeienausso op eng beweegend an authentesch Aart a Weis festgehalen an un déi nächst Generatioune weiderginn.

Als direkten Zeie vun de Grausamkeete vun der Shoah huet de Gerd Klestadt sech säi ganzt Liewe laang mat groussem Engagement fir d’Erënnerungskultur an d’Vermëttlung vun der Geschicht agesat. Bei dëser beweegender Konferenz war och seng Duechter Carmie present, wat dësem Moment vun Erënnerung a Geschichtsvermëttlung eng besonnesch emotional Dimensioun ginn huet.

Fotoen: Gemeng Suessem / Cliff Schmit